MKOA WA DAR ES SALAAM WAJIPANGA MAPOKEZI WAKUU WA NCHI MKUTANO WA NISHATI

Ni kuelekea Mkutano wa viongozi hao kuhusu Nishati utakaofanyika kuanzia Januari 27 hadi 28 mwaka huu, Barabara ya Nyerere hadi Posta kufungwa taa zaidi ya 300 kuimarisha usalama, RC Chalamila afanya ziara kutembelea maandalizi…..

ABRAHAM NTAMBARA NA TUNU BASHEMELA

MKUU wa Mkoa wa Dar es Salaam Albert Chalamila amesema maandalizi ya mapokezi ya Wakuu wa Nchi za Afrika kuelekeza Mkutano wa viongozi hao kuhusu Nishati utakao ongozwa na Rais Dkt. Samia Suluhu Hassan yamefikia zaidi ya asilimia 70.

RC Chalamila alibainisha hayo jana akizungumza na waandishi wa Habari jijini Dar es Salaam baada ya kufanya ukaguzi wa maeneo mbalimbali ambayo watapita wageni wa Mkutano huo wakiwemo Marais wa Afrika zaidi ya 10.

Maeneo aliyotembelea na kufanya ukaguzi ni Uwanja wa Ndege wa Kimataifa wa Julius Nyerere (JNIA), Barabara ya Nyerere kutoka JNIA hadi Posta, Viwanja vya Karimjee Pamoja na Ukumbi wa Mikutano wa Kimataifa wa Juluius Nyerere (JNICC) ambapo mkutano huo utafanyika kuanzia Januari 27 hadi 28 mwaka huu.

Alisema kuwa Serikali inaratibu mkutano huo Mkubwa wa Nishati barani Afrika, hivyo kuelekea mkutano huo kama Mkowa wamepewa majukumu ya kufanya ambapo alieleza kuwa moja ya majukumu hayo ni kuhakikisha usafi wa maeneo yote nyeti ambayo wageni watapita.

“Serikali inaratibu Mkutano Mkubwa wa Nishati barani Afrika, Mkutano huu ni wakuharakisha upatikanaji wa Nishati kwa watu milioni 300 barani Afrika. Hivyo katika maandalizi haya Mkoa umepewa majukumu ya kufanya ikiwemo kufanya usafi,” alisema RC Chalamila.

RC Chalamila alieleza kuwa Mkoa umejipanga kuhakikisha meneo yote nyeti yanakuwa safi ambapo alitaja baadhi ya maeneo hayo kuwa ni Pamoja na Uwanja wa Ndege wa Mwalimu Nyerere (JNIA), Barabara ya Nyerere hadi Posta, Coco Beach na Karimjee.

Hivyo alisema vyombo vya dola kwa kushirikiana na wananchi Jumamosi mwishoni mwa wiki hii watafanya usafi mkoani humo na kuwataka wananchi kutoshangaa wala kuogopa watakapo viona vyombo hivyo vikifanya usafi mitaani.

Kadhalika alisema kuwa uongozi wa Mkoa umepanga kuhakikisha majengo yote yaliyopo kando kando ya badabara ambapo wageni watapita yapakwe rangi, hivyo wameagiza wamiliki wote wa majengo hayo kuyapaka rangi ili yawe na mwonekano mzuri na kuweka taswira nzuri ya Jiji.

Hivyo alitumia fursa hiyo kuwaagiza Wakuu wa Wilaya kuhakikisha majengo hayo yote yanapakwa rangi.

Kadhalika katika kuutangaza Mkutano huo, RC Chalamila alisema mabango yanayohusu mkutano yatawekwa katika maeneo mbalimbali yam ji ambapo alisisitiza kuwa malengo ya mkutano na kufikisha Nishati ya Umeme kwa watu milioni 300 jambo ambalo linaunga mkono Kampeni ya Rais Dkt. Samia Suluhu Hassan ya Matumizi ya Nishati Safi ya Kupikia.

Akizungumzia kuhusu paking za magari, alisema kuwa hadi kufikia Januari 20 Maliro yote hayataruhusiwa kupaki pembezoni mwa barabada hususan katika Barabara ya Nreyeye, hivyo aliwataka wamiliki wa Malori kuhakikisha wanatafuta sehemu ya kuyapaki.

Kwamba Malori hayo kupaki pambezoni mwa Barabara ni saw ana uchafu jambo ambalo linachafua taswira ya Jiji ambapo alisisitiza kwa hadi kufikia Januari 20 mwaka huu Malori hayo hayatakiwi kuonekana pembezoni mwa Barabara.

Kuhusu ufungaji wa taa, alieleza kuwa zaidi ya taa 300 zitafungwa Barabara ya Nyerere hadi Posta na kwamba hadi kufukia Januari 20 nazo pia zitakuwa zimeshafungwa kwa ajili yakupendezesha taswira ya Mji sambamba na kuimarisha usalama kwa ajili ya wageni.

Hivi karibuni akieleza sababu za Tanzania kuwa Mwenyeiji wa Mkutano huu, Mkurugenzi wa Idara ya Ushirikiano, Waizaya ya Mambo ya Nje na Ushirikiano wa Afrika Mashariki Balozi Noel Kaganda alisema Tanzania ni miongoni mwa nchi za Afrika zinazofanya vizuri katika Sekta ya Nishati.

Alisema hadi kufikia Disemba 2024, uzalishaji umeme kwa Tanzania bara ulikuwa umefikia Megawati 3,169.20, upatikanaji wa umeme umeongezeka kutoka asilimia 14 mwaka 2011 hadi asilimia 78.4 mwaka 2020. Kwamba kufuatia Mpango wa Usambazaji Umeme vijijini (REA), takriban vijiji vyote nchini vimefikiwa

Sababu nyingine ni kuwa Rais Dkt. Samia amekuwa kinara wa kuhamasisha matumizi ya nishati safi ya kupikia ambapo  amefanya hivyo kwenye majukwaa mbalimbali ya kimataifa, ikiwemo COP 27, 28 na 29, Mkutano wa Wakuu wa Nchi za Afrika kuhusu Nishati Safi ya Kupikia (May, Paris), Mkutano wa G20 (Nov, Rio de Janeiro).

Kadhalika Tanzania ina mikakati kabambe ya kuongeza upatikanaji wa umeme wa uhakika, endelevu na wa gharama nafuu kwa wote hadi kufikia asilimia 75 ifikapo mwaka 2030 na asilimia 80 hadi ifikapo 2034 kwa upande wa nishati safi ya kupiki na kushamiri kwa diplomasia, Amani, utulivu, ukarimu, uzoefu.