Tume maboresho ya kodi yaingia kazini

Mwenyekiti wa Tume hiyo Balozi Ombeni Sefue

*Ni ile iliyoundwa na Rais Samia kufuatia malalamiko ya muda mrefu ya wananchi, wafanyabiashara na wawekezaji

*Yakusudia kufanya tathmini kwa kushirikisha wananchi wengi kuainisha changamoto zilizopo

NA MWANDISHI WETU

Tume ya Rais ya Maboresho ya Kodi imeanza kazi na sasa iko tayari kushirikiana na kumsikiliza kila mdau ili hatimaye mapendekezo yatakayowasilishwa kwa Rais Dkt. Samia Suluhu Hassan yaakisi uzoefu na maoni ya kila mwenye mchango wa kutoa katika kuboresha mfumo wa kodi nchini.
Hayo yamebainishwa leo na Mwenyekiti wa Tume hiyo Balozi Ombeni Sefue akizungumza na waandishi wa habari kuhusu kuanza kazi kwa Tume iliyozinduliwa Oktoba 4, 2024 na Rais Dkt. Samia kwa lengo la kutathmini na kushauri kuhusu maboresho ya kodi nchini.
"Tungependa kupitia kwenu, kuwajulisha wananchi kuwa Tume imeanza kazi, kama mjuavyo Tume hii imeundwa kufuatia malalamiko ya muda mrefu kutoka kwa wananchi,

wafanyabiashara na wawekezaji kuhusu kero mbalimbali zinazotokana na mfumo wa kodi nchini. Kodi ni nguzo muhimu kwa maendeleo ya nchi yoyote ile duniani," alisema Balozi Sefue na kuongeza,"Hatudhani yupo mwananchi ambaye hajui umuhimu wa kodi ambazo hatimaye ndizo hugharamia kwa kiwango kikubwa maendeleo tunayoyatamani na tunayoyastahili. Tatizo lipo kwenye changamoto zinazojitokeza katika kukadiria na kulipa kodi, ikiwa ni pamoja na wingi wa kodi, taratibu za kikodi, usumbufu na uwiano kati ya kodi na mapato mengine ya Serikali yasiyo ya kikodi,".

Kwamba kwa kuunda tume hiyo Rais ameonesha utashi wa kisiasa wa kushughulikia changamoto hizo ambapo hatua ya kwanza ni kufanya tathmini ya kina ya mfumo uliopo ili kuwa na msingi wa kufanya maboresho ambayo ni wazi yanahitajika.

"Hatimaye, lengo la Serikali ni kuhakikisha kuwa tunakuwa na mfumo wa ukusanyaji mapato ulio rafiki na rahisi, na unaozingatia haki, usawa na uwazi. Hivyo, tathmini itakayofanywa itazingatia maeneo yote muhimu ikiwemo Sera, Sheria, Kanuni na taratibu zote zinazohusika," aliongeza Balozi Sefue.

Balozi Sefue alisema Tume imekusudia kufanya tathmini hiyo kwa kushirikisha wananchi wengi iwezekanavyo ili kuainisha changamoto zilizopo, lakini hasa na muhimu zaidi ni kukusanya mapendekezo yanayotekelezeka na yatakayosaidia kuongeza mapato ya Serikali lakili kwa njia iliyo rafiki na rahisi zaidi.

"Tunafahamu kwamba uchumi wa nchi yetu unakua kwa kiwango kizuri. Mathalani katika kipindi cha miaka mitatu iliyopita, pato halisi la taifa limekuwa kwa wastani wa asilimia 4.7, huku mapato ya kodi yakifikia wastani wa asilimia 12.1 ya pato la taifa. Kwa kawaida ungetarajia kasi ya ukuaji huu wa uchumi iende sambamba na kasi ya ongezeko la mapato ya Serikali. Kiwango tulichofikia cha asilimia 12.1 ya pato la taifa ni chini ya asilimia 15 ya pato la taifa inayohitajika katika nchi za Afrika Kusini mwa Jangwa la Sahara ili kujenga uwezo wa kufikia malengo ya kimataifa ya maendeleo endelevu," alieleza Balozi Sefue.

Kwamba Serikali imedhsmiria kufikia kiwango hicho cha asilimia 15 ya pato la Taifa ifikapo mwaka 2026/2027, hatua itakayoongeza uwezo w nchi kugharamia miradi ya maendeleo na kupunguza kiwango cha utegemezi wa mikopo na misaada.
Hivyo alisema kuwa wanayo kazi kubwa ya kuongeza mapato ya Serikali ili kufikia kiwango hicho ikiwemo kwa kupanua wigo wa walipa kodi, kuziba mianya ya ukwepaji kodi, kuongeza ufanisi kwenye kukusanya mapato na kwa kuweka mazingira mazuri ya wananchi kuanzisha na kukuza biashara, pamoja na mazingira mazuri ya uwekezaji kwa ujumla.