MATUMIZI HUDUMA ZA MAWASILIANO YAONGEZEKA,LAINI ZA SIMU MILIONI 72.5 ZIMESAJILIWA HADI MACHI 2024

 

 

NA MWANDISHI WETU

MAMLAKA ya Mawasiliano Tanzania (TCRA) imesema hali ya mawasiliano katika robo inayoishia machi 2024 imeonesha maendeleo makubwa kwa kuongezeka kwa utumiaji wa huduma za mawasiliano, ikichochewa na ushindani endelevu wa bei za huduma.

Hayo yamebainishwa jana na Mkurugenzi Mkuu wa TCRA Dkt. Jabiri Bakari akizungumza katika kikao cha mashauriano kati ya TCRA na Wahariri wa Vyombo vya Habari vya Magazeti kuhusu takwimu za huduma za Mawasiliano ya Simu yaliyofanyika Makao Makuu ya Mamlaka hiyo jijini Dar es Salaam.

Mathalani Dkt. Bakari akifafanua kuhusu takwimu za usajili wa laini za simu, alisema laini zilizosajiliwa imeongezeka kutoka milioni 70.3 katika robo ya mwaka iliyoishia Disemba 2023 hadi milioni 72.5 kwa robo inayoishia Machi 2024 hilo likiwa ni ongezeko la asilimia 3.1.

Alibainisha kuwa laini hizo ni za simu za mkononi na simu za mezani ambazo zimetumika angalau mara katika miezi mitatu iliyopita.

“Moja ya mafanikio hayo ni kuenea kwa mtandao wa simu za mkononi katika teknolojia mbalimbali, ambapo mtandao wa 3G umeenea kwa 88% ya watu, na hivyo kuongeza upatikanaji wa huduma ya Intaneti,” alisema Dkt. Bakari.

Kwamba kuenea kwa mtandao wa 4G kwa asilimia 80 ya watu kumeongeza kasi na upatikanaji wa uhakika wa huduma ya Intaneti, wakati uo huo, 5G imeenea kwa asilimia 13 ya watu huku ikileta zama mpya ya mtandao wa kasi ya juu ambayo ni muhimu kwa mahitaji ya Intaneti ya kasi.

Dkt. Bakari alisema mafanikio hayo yameambatana na uboreshaji wa huduma za mawasiliano, udhibiti wa majaribio ya ulaghai na uimarishaji wa miundombinu ili kufikia Uchumi wa kidijiti.

Kadhalika, alibainisha kuwa Sekta ya utangazaji ilipata mwelekeo mzuri wa ongezeko la asilimia 2.5 la visimbuzi ikilinganishwa na robo mwaka iliyopita ambapo ukuaji huo umechangiwa na kuongezeka kwa ubora wa huduma kwa wateja wa huduma ya utangazaji.

Alisema maboresho hayo ya pamoja katika sekta ya mawasiliano ni muhimu katika kukuza jamii iliyounganishwa na iliyowezeshwa kidijitali.