Benki ya Biashara Tanzania yatenga bilioni 300 kwa ajili ya wajasiriamali

Afisa Mtendaji Mkuu wa Tanzania Commercial Bank (TCB), Adam Mihayo, akizungumza katika Mkutano wa Taasisi hiyo na Wahariri na waandishi wa Habari uliofanyika leo Aprili 9, 2024 Jijini Dar es Salaam, chini ya Uratibu wa Ofisi ya Msajili wa Hazina.

Benki ya TCB yalenga kuwafikia wajasiriamali 2,000

Yatangaza ongezeko la faida ya bilioni 10.7 kwa kipindi cha robo ya kwanza Machi, 2024.

BENKI ya Biashara Tanzania (TCB) imetenga mwaka huu 2024 imetenga shilingi bilioni 300 kwa ajili ya kuwasaidia wajasiriamali nchini katika kukuza mitaji ya biashara zao.

Hayo yamebainishwa jana jijini Dar es Salaam na Ofisa Mtendaji Mkuu wa TCB Adam Mihayo wakati akizungumza na Wahariri na waandishi wa Habari kuhusu mafanikio ya Benki hiyo.

“Mwaka huu tumetenga shilingi bilioni 300 na tunapanga kuwalenga wajasiriamali 2,000 na kwa nini nilisema hivyo, kwa sababu ni kipengere muhimu sana ni ‘growth engine’ ya uchumi wetu, asilimia 90 ya GDP inakuwa ‘driven’ (inaendeshwa) na hawa hapa,” alisema Mihayo na kuongeza,

“Na kwa kufanya hivyo basi, tutakuwa tunaunga mkono moja kwa moja ajenda ya maendeleo ya kijamii na kiuchumi,”.

Katika hatua nyingine Mihayo alitangaza ongezeko la faida ya shilingi bilioni 10.7 za kitanzania baada ya makato ya kodi kwa kipindi cha robo ya kwanza ya mwaka ambayo ilifikia tamati Machi 31, 2024.

Afisa Habari Mwandamizi wa Ofisi ya Msajili wa Hazina Sabatho Kosuri, akizungumza alipokuwa akitoa neno la utangulizi katika mkutano huo, uliofanyika leo Jijini Dar es Salaam.

Wahariri wa vyombo mbalimbali vya habari wakimsikiliza Afisa Mtendaji Mkuu wa Tanzania Commercial Bank (TCB), Adam Mihayo katika mkutano unaoratibiwa na Ofisi ya Msajili wa Hazina mkutano huo uliofanyika leo Jijini Dar es Salaam.

“Benki inaamini ongezeko hili la asilimia 358 katika mapato yake kipindi cha robo ya kwanza yametokana na ukuaji mkubwa wa mapato katika aina zake zote za biashara na ongezeko kubwa la kitabu cha mizania katika kipindi tajwa kilichopitiwa,” alisema Mihayo.

Mihayo alieleza kuwa mapato yaliongezeka kwa asilimia 30 mpaka kufikia shilingi bilioni 56.8 za kitanzania yakiimarishwa na kitabu cha mizania na kasi kubwa ya ukuaji katika mapato yote.

Aidha, alisema amana za wateja zimeongezeka kwa asilimia 12 kufikia shilingi trilioni 1.1 za kitanzania ikiashiria imani kubwa ya wateja kwa benki, wakati huohuo mikopo kwa wateja imepanda kwa asilimia 15.4 kufikia shilingi bilioni 983.6 za kitanzania hadi Machi 31, 2024.

Kwamba hiyo inaonyesha dhamira ya benki katika kuwezesha ukuaji wa uchumi na maendeleo ya watu wake.

Alisema, “Ninajivunia kuwatangazia utendaji wetu wa kipekee katika kipindi cha robo ya kwanza ya mwaka 2024. Ukuaji mkubwa huu unasukumwa na dhamira yetu ya dhati na kujizatiti kwetu katika ufanisi ili kumridhisha mteja. Sisi ni benki ambayo inachukua muda wake kuwasikiliza wateja wetu na kuweka juhudi katika kuelewa mahitaji yao.”

Aliendelea kusema, “kwa ongezeko hili la mapato kwa asilimia 30 tumedhihirisha kwa mara nyingine tena ujasiri wetu, na uwezo wetu wa kulikabili soko linalokua kwa kasi. Imani ya wateja wetu kwetu bado ni imara kama inavyothibitishwa na ongezeko la amana ya wateja. Vile vile, dhamira yetu katika kuimarisha ukuaji wa Uchumi inadhihirika wazi katika ongezeko la mikopo kwa wateja wetu. Tukiendelea na safari hii ya mafanikio, tunajizatiti kuwafikishia watu ubunifu wa kifedha na kuchangia katika ustawi wa watu wetu na Taifa letu kwa ujumla.”

Alieleza jumla ya gharama kulingana na kipato katika robo hii ya kwanza ni shilingi bilioni 43.2 za kitanzania, sawa na ongezeko la asilimia 6.1 ukilinganisha shilingi bilioni 40.7 na robo ya kwanza ya mwaka jana 2023, wakati huohuo jumla ya gharama za uendeshaji imepanda kidogo kutoka shilingi bilioni 26.5 za kitanzania mwishoni mwa robo ya kwanza ya mwaka 2023 hadi kufikia shilingi bilioni 26.8 za kitanzania mwishoni mwa robo ya kwanza ya mwaka 2024.

Mhariri wa Mtendaji wa gazeti la Tanzania Yetu Tunu Bashemela akimuliza Afisa Mtendaji Mkuu wa Tanzania Commercial Bank (TCB), Adam Mihayo katika mkutano unaoratibiwa na Ofisi ya Msajili wa Hazina mkutano huo uliofanyika leo Jijini Dar es Salaam.

Mkurugenzi Mtendaji TCB, Adam Mihayo alisisitiza kuwa, “tumejizatiti kuendeleza jitihada katika kutekeleza mkakati wetu ambao unazingatia ufanisi wa uendeshaji, na kuendelea kupunguza gharama zetu kwa uwiano wa mapato licha ya kuongezeka kwa kipindi hiki."

Aliongeza, Benki inahusisha ukuaji huu wa faida na maendeleo endelevu ya biashara ndogondogo na za kati nchini. Hali kadhalika, katika kufikia lengo la benki juu ya wafanyabiashara wadogowadogo na wakati, TCB Benki imetumia njia ya kidigitali katika kufanya ufumbuzi wa kibenki, na hivyo kuwapa wateja wake ufanisi, urahisi na uwezo wa kufanya shughuli za kimiamala.

Kwamba mwelekeo huu wa kimkakati unaimarishwa na mkakati wa kidigitali unaoendelea, ambao umeiwezesha benki kuwa karibu zaidi na wateja wake kuliko awali na kuwaruhusu wao kuendelea kujipatia huduma za kibenki katika sehemu zinazowapendeza wao na kuimarisha uhusiano wa kuaminiana kati ya benki na wateja wake.

Alibainishwa kwamba, mtandao wa mawakala wa kibenki wa TCB Benki, umekua kwa takribani mara nne katika kipindi cha miaka mitatu iliyopita, kutoka idadi ya mawakala 1,584 mwaka 2020 hadi zaidi ya mawakala 6,000 kwa mwaka 2023.

Alibainisha, idadi ya mashine za UmojaSwitch za ATM zimeongezeka kutoka 250 mwaka 2020 hadi kufikia mashine 281 kwa mwaka 2023. Katika kipindi hiki, TCB Benki pia imeanza kutoa kadi za VISA.

Alieleza UmojaSwitch imeingia ubia na NMB Benki na katika robo hii ya kwanza ya mwaka 2024, kwamba tayari kuna mashine za ATM 750 za NMB ambazo zimeunganishwa na ATM za UmojaSwitch.

“Hii inafanya jumla ya mashine za ATM za UmojaSwitch kufikia 1,031 katika robo ya kwanza ya mwaka 2024. TCB Benki imeweza kuanzisha bidhaa bora kama vile, M-Koba. Nimatumaini ya uongozi kwamba tutaendelea kutoa bidhaa zinazowalenga wateja ambazo zitaendelea kuvunja rekodi kwa kipindi chote cha mwaka 2024 na kuendelea,”.